На “Беларусь 3” пакажуць дакументальна-хранікальны фільм “Біяграфія маёй рэспублікі”

У рамках эфірных акцый, прымеркаваных да векавога юбілею беларускага кінематографа, “Беларусь 3” працягвае знаёміць гледачоў са здабыткамі залатога фонду Белтэлерадыёкампаніі. Так, на тыдні з 27 мая сацыякультурны тэлеканал пакажа 6-серыйны дакументальна-хранікальны фільм “Біяграфія маёй рэспублікі”.

У аснове стужкі “Біяграфія маёй рэспублікі” (1968, рэжысёры – І. Рудамётаў, В. Карпілаў, І. Вейняровіч, У. Станкевіч, А. Ястрабаў) – унікальныя дакументальныя кадры, якія аўтарам давялося збіраць у беларускіх і расійскіх архівах, а таксама рэдкія кадры значных падзей, зафіксаваныя рэжысёрамі Беларускага тэлебачання. Фільм, створаны да 50-годдзя БССР, падрабязна распавядае пра гісторыю развіцця краіны і дасягненні народа ў розных сферах.

Відэастужка з фільмам “Біяграфія маёй рэспублікі” захоўваецца ў Беларускім дзяржаўным архіве кінафотафонадакументаў. Літаральна нядаўна спецыялісты галоўнай дырэкцыі фондавых матэрыялаў генеральнага прадзюсарскага цэнтра Белтэлерадыёкампаніі пачалі працу па аблічбоўванню фільма.

– У працэсе аблічбоўвання кінастужкі 1968 года і пры апрацоўцы дадзенага матэрыялу, безумоўна, узнікае шэраг праблем. Таму над рэстаўрацыяй адной серыі інжынер працуе з вялікай канцэнтрацыяй увагі не менш за 4 дні, – адзначае галоўны дырэктар галоўнай дырэкцыі фондавых матэрыялаў Ала Вярэніч.

Стужка існуе ў двух моўных варыянтах – беларускім і рускім. І, як паказала практыка, гэта стала добрым падспор’ем у працэсе аблічбоўвання і ўзнаўлення.

– Варыянт на беларускай мове якасна горшы, таму патрабуе больш працяглага рабочага працэсу з параметрамі гуку і відэавыявы, – патлумачыла Ала Вярэніч.

У тэлегледачоў будзе магчымасць пазнаёміцца з абодвума варыянтамі дакументальна-хранікальнай стужкі. Так, на тыдні з 27 мая “Беларусь 3” у рамках рэтраспектыўнага паказу прапануе ўсе серыі фільма “Біяграфія маёй рэспублікі” з агучкай на рускай мове.