Տավուշում իրականացվող սահմանագծման գործընթացը հերթական «տրոյական ձին» է, հերթական դավադրությունը. Սեյրան Օհանյան
Տավուշում միջազգային և պետական օրենքների կոպտագույն խախտումներով իրականացվող սահմանագծման գործընթացը հերթական «տրոյական ձին» է, հերթական դավադրությունը։
Ֆեյսբուքի էջում գրել է ԱԺ «Հայաստան» խմբակցության ղեկավար Սեյրան Օհանյանը․
«Հայաստանի շուրջ օղակն օրեցօր սեղմվում է։ Տարածաշրջանում ռազմաքաղաքական սրընթաց զարգացումները ստիպում են օր առաջ համախմբվել և ամուր, անխոցելի ճակատ կազմել մեզ ուղղված բացահայտ թշնամանքի, սպառնալիքների առաջ։
Ադրբեջանի և Հայաստանի իշխանությունների կողմից շահարկվող «խաղաղության օրակարգը», Տավուշում միջազգային և պետական օրենքների կոպտագույն խախտումներով իրականացվող սահմանագծման գործընթացը հերթական «տրոյական ձին» է, հերթական դավադրությունը՝ ծրագրված Հայաստանի Հանրապետության ինքնիշխանության, հայ ժողովրդի անվտանգության, լինելիության դեմ։
Սակայն այս ճակատամարտի ելքը որոշվելու է մեր ընտրությամբ։
Կհամախմբենք՝ հանուն Հայի, Հայաստանի, Հայրենիքի, Աստծո, կունենանք պետություն, բանակ, անվտանգություն, արժանապատվություն։
Ուստի կոչ եմ անում բոլորին այս գիտակցումով մայիսի 26-ին՝ ժամը 16:00, գալ Հանրապետության հրապարակ և միանալ համազգային ազատագրական շարժման այլևս անբեկանելի ալիքին։
Մեր պայքարն արդար է»։