Eurovision visita o circuito da Illa das Esculturas para planificar a cobertura televisiva do Campionato de Europa de ciclocrós de Pontevedra

Unha delegación de Eurovision visitou os pasados 17 e 18 de xuño o circuíto da Illa das Esculturas en Pontevedra, que acollerá en novembro o Campionato de Europa de ciclocrós organizado pola Federación Ciclismo Galego. Nunha revisión minuciosa do percorrido, situáronse as posicións de cámaras fixas, móbiles, guindastres, cámaras desde cable ou zonas para o voo de drone que garanten unha cobertura espectacular tanto deportiva como turística da proba.

Os responsables da produción de Eurovision, Marc Stanislas e Olivier Moser; os responsables técnicos de Mediapro, Hugo Rocha e J. Correia; o xefe de prensa da UEC, Stefano Bertolotti; o director técnico do circuíto de CX Pontevedra, Berto del Río; os responsables do circuíto, Yeray del Río e Zoe del Río; e o responsable de comunicación de CX Pontevedra, Álvaro García; formaron parte da comitiva que inspeccionou o circuíto. Foron máis de 6 horas percorrendo os 3’5 quilómetros pola Illa dás Esculturas, e realizando unha proxección da localización de cámaras, da súa afectación ao circuíto, ao público e da posición da loxística que o Campionato de Europa de ciclocrós require.

As probas que se disputarán o domingo 3 de novembro, que corresponden coas mangas elite, sub-23 e junior tanto feminina como masculina, terán a cobertura televisiva e a emisión a nivel internacional tanto dos éxitos deportivos como de Pontevedra e a marabillosa Illa das Esculturas, na que se desenvolverá o Campionato de Europa de ciclocrós.