Эшләүче пенсионерларның пенсиясен индексацияләү турындагы закон проекты 25 июньдә карала
25 июньдә Дәүләт Думасы эшләүче пенсионерларга пенсия түләүләрен индексацияләү турындагы закон проектын беренче укылышта караячак. Бу хакта Россия парламентының түбән палатасы телеграм-каналында хәбәр ителә.
«Эшләүче пенсионерларның пенсияләрен индексацияләү турындагы закон проекты Дәүләт Думасы өстенлекле тәртиптә караячак инициативалар исемлегенә кертелгән», - дип билгеләп үтте Дәүләт Думасы Рәисе Вячеслав Володин.
Закон проектын «Бердәм Россия» кертте. Пенсияләр 2025 елның 1 февраленнән индексацияләнә башлаячак, дип фаразлана. Нәтиҗәдә, инициатива Татарстанда яшәүче 200 меңнән артык кешегә кагылырга мөмкин.