Երևանում անչափահաս վարորդը մահվան ելքով վրաերթի է ենթարկել հետիոտնին
Երևանում անչափահաս վարորդը Mercedes մակնիշի վրացական համարանիշներով ավտոմեքենայով մահվան ելքով վրաերթի է ենթարկել հետիոտնին:
Ինչպես հայտնում է shamshyan.com-ը, դեպքը տեղի է ունեցել հունիսի 29-ին ժամը 20։10-ի սահմանում:
Մասնավորապես, Երևանի 17-ամյա բնակիչ Դավիթ Գ․-ն Վիլնյուսի փողոցում վրաերթի է ենթարկել Երևանի 76-ամյա բնակիչ Հովհաննես Ի․-ին։ Վարորդը փախուստի չի դիմել, ահազանգել է շտապօգնություն, բժիշկների հերթապահ խումբը վիրավորին տեղափոխել է «Սուրբ Գրիգոր Լուսավորիչ» բժշկական կենտրոն։
Մինչ դեպքի վայրում աշխատում էր քննչական խումբը հիվանդանոցից ոստիկանության Նոր Նորքի բաժին ահազանգ է ստացվել, որ վիրավորը, գիտակցության չգալով, մահացել է։ Դեպքի փաստով քննչական բաժնում նախաձեռնվել է քրեական վարույթ։ Վարորդը տեղում ենթարկվել է սթափության փորձաքննության, եղել է սթափ։ Քննիչի հանձնարարականով ավտոմեքենան տեղափոխվել է ՊԾ Երևան քաղաքի գնդի պահպանվող հատուկ տարածք։