Հունգարիայի վարչապետը պատերազմի սկզբից ի վեր առաջին անգամ է ժամանել Ուկրաինա

Հունգարիայի վարչապետ Վիկտոր Օրբանը հուլիսի 2-ին ժամանել է Կիև՝ Ուկրաինայի նախագահ Վլադիմիր Զելենսկու հետ բանակցությունների համար։ Այս մասին հայտնել է Հունգարիայի կառավարության ղեկավարի մամուլի ծառայությունը։

Օրբանը և Զելենսկին մտադիր են քննարկել «խաղաղության հասնելու հնարավորությունները և հունգարա-ուկրաինական երկկողմ հարաբերություններում ընթացիկ հարցերը», - գրում է Reuters-ը:

Սա Հունգարիայի վարչապետ Վիկտոր Օրբանի առաջին այցն է 2022 թվականի փետրվարին սկիզբ առած ռուս-ուկրաինական հակամարտությունից ի վեր։

Եվրամիության գրեթե բոլոր առաջնորդները, բացի Օրբանից, այցելել են Կիև 2022 թվականի փետրվարի 24-ից հետո: Մինչդեռ Օրբանը և Ավստրիայի կանցլեր Կառլ Նեհամերը ԵՄ միակ ղեկավարներն են, որոնք այս ընթացքում հանդիպել են ՌԴ նախագահ Վլադիմիր Պուտինի հետ: