Հայէկոնոմբանկի ռազմավարությունն ուղղված է շարունակական թվային փոխակերպմանը՝ այն դարձնելով մտածելակերպ և աշխատելաոճ. Արփինե Փիլոսյան

Հայէկոնոմբանկի Գործադիր տնօրենի տեխնոլոգիաների գծով տեղակալ Արփինե Փիլոսյանը խոսել է նորագույն տեխնոլոգիաների, բանկի թվային փոխակերպման կարևորության և մարտահրավերների, մոբայլ/օնլայն բանկինգով մատուցվող ծառայությունների և առաջիկա պլանների մասին:

Թվային հարթակ, թվային փոխակերպում, նորագույն տեխնոլոգիաներ… Այսօր այս տերմինները կարծես դարձել են նաև բանկային համակարգի անբաժանելի մասը, և Դուք էլ մի քանի անգամ Ձեր խոսքում օգտագործեցիք նմանատիպ հասկացություններ: Ինչու՞ են այս տերմիններն այդքան արդիական դարձել նաև բանկային ոլորտի համար։

Բանկային համակարգում թվային փոխակերպման և նորագույն տեխնոլոգիաների ներդրման առաջնային պահանջը գալիս է հաճախորդից, իսկ նման պահանջները ժամանակակից աշխարհում բավականին արագ են փոփոխվում, փոխվում են հաճախորդի կարիքները: Հետևաբար, բանկերը պետք է ոչ պակաս արագ վերափոխվեն՝ արագ արձագանքելով հաճախորդի յուրաքանչյուր պահանջին, հատկապես հաշվի առնելով այն հանգամանքը, որ բանկերի համար այժմ էական մրցակից են ոչ միայն բանկերը, այլև ֆինտեխ ընկերությունները: Ֆինանսական հաստատություններն այժմ հիմնականում մրցակցում են թվային հարթակներում մատուցվող առցանց ծառայություններով, նրանց արագությամբ, պարզ ինտերֆեյսով, անվտանգությամբ, պրոդուկտների հարուստ փաթեթով: Միևնույն ժամանակ, հաճախորդները հակված են օգտվելու այնպիսի հարթակներից, որոնք առանց բանկ այցելելու, 24/7 սկզբունքով հնարավորություն են տալիս իրականացնել անվտանգ, ցանկալի բանկային ծառայություններ, ստանալ ֆինանսական օնլայն խորհրդատվություն:

Ժամանակակից բանկային համակարգը ֆինանսական շուկայում մրցակցում է թվային հարթակներում մատուցող ծառայություններով, հիմնականում՝ մոբայլ/օնլայն բանկինգով: Ինչո՞վ է առանձնանում բանկը տվյալ հարթակում։

Բանկի ռազմավարությունն ուղղված է շարունակական թվային փոխակերպմանը՝ այն դարձնելով մտածելակերպ և աշխատելաոճ: Այստեղ շատ կարևոր է հաշվի առնել այն հանգամանքը, որ թվային ցանկացած լուծման և գործընթացի հիմքում հաճախորդի պահանջմունքի բավարարումն է: Հետևաբար, բանկի զարգացման ուղղություննները, առավել ևս թվային հարթակում, հենց այս նպատակին ծառայելու միտում ունեն՝ ապահովելու հաճախորդակենտրոն միջավայր, որտեղ հաճախորդը կարող է ստանալ ֆինանսական խորհրդատվություն և բանկային ծառայություններ, իրականացնել ֆինանսական գործառնություններ, տեղեկանալ բանկի նորություններին՝ ստեղծելով հաճախորդի մոտ զգացողություն, որ անկախ հարթակից, հաճախորդն իր բանկում է:             

Մենք շատ խոսուն կարգախոս ենք ընտրել մեր մոբայլ/օնլայն բանկինգի (AEB Mobile/Online)  համար՝ Your digital bank (Քո թվային բանկը), քանի որ այն հաճախորդի հետ խոսելու և հաճախորդին արագ արձագանքելու միջոց է, որը հնարավորություն է տալիս հաճախորդի հետ 24/7 սկզբունքով հաղորդակցվելու աշխարհի բոլոր անկյուններից՝ նրան հասանելի դարձնելով բանկի կողմից մատուցվող գրեթե բոլոր ծառայությունները: Անգամ ավելին ասեմ. թվային հարթակում բանկի հաճախորդները կարող են օգտվել այնպիսի հավելյալ ծառայություններից, ինչպիսիք են  թվային քարտերի պատվիրումը, ակնթարթային վարկի տրամադրումը, Visa Direct և Money Send փոխանցումները, Visa Stop Payment Service-ը, մոբայլ հավելվածից քարտի կցումն ApplePay/GooglePay դրամապանակին և այլն:

Որո՞նք եք համարում թվային փոխակերպման ժամանակակից մարտահրավերներ, և ի՞նչ քայլեր եք ձեռնարկում այդ մարտահրավերներին դիմակայելու համար:

Արդեն խոսեցինք, որ բանկերը շարունակաբար բախվում են մրցակիցների, այդ թվում՝ ֆինտեխ ընկերությունների նետած մարտահրավերներին, հետևաբար՝ հաճախորդների պահանջներին և կարիքներին հարմարեցված պրոդուկտների արագ մշակման և ծառայությունների մատուցման, այսինքն՝ հաճախորդին արագ և, միևնույն ժամանակ, «որակյալ» արձագանքելու կարողությունները ռազմավարական նշանակություն ունեն: Հաճախորդներն այլևս պատրաստ չեն ստանալու ստանդարտ լուծումներ, բանկերն էլ այլևս չեն կարող առաջարկել տասնամյակներ շարունակ օգտագործվող պատրաստի լուծումներ: Մրցակցությունն այս առումով առաջիկայում ավելի կսրվի, քանի որ բաց ֆինանսական ծառայություններն արդեն իսկ ներթափանցել են մեր ֆինանսական շուկա, և բանկերն ակամա ստիպված են լինելու մրցակցել այլ հարթակում: Քիչ մանրամասնեմ, քանի որ այս հասկացությունը դեռ այդքան հաճախ չենք օգտագործում. բանկային բաց ծառայությունների, այսինքն՝ open banking-ի միջոցով հաճախորդները կարող են երրորդ կողմի հարթակներում/հավելվածներում իրականացնել ֆինանսական գործառնություններ, կատարել բանկային վճարումներ, կառավարել բանկային հաշիվներ և այլն: Ընդ որում նշեմ, որ այս առումով մենք բանկային շուկայում առաջիններից ենք, որ հաջողեցինք մեր նորարարական նախագիծն open banking-ի շրջանակում՝ հնարավորություն ընձեռելով հաճախորդին միևնույն հարթակում րոպեների ընթացքում թողարկվող անվճար Visa թվային քոբրենդ քարտի միջոցով օգտվելու և՛ բանկի, և՛ գործընկերոջ կողմից մատուցվող բոլոր ծառայություններից:

Ի՞նչ այլ լուծումներ ունի բանկը հաճախորդի կյանքը հեշտացնելու համար, ի՞նչ ասել է «հաճախորդակենտրոն ենք», ի՞նչ քայլեր եք ձեռնարկել դրա համար:

Բանկը մշտապես մեծ ուշադրություն է դարձնում մատուցվող ծառայությունների բազմազանությանը և նրանց որակի բարձրացման գործընթացին՝ ընդլայնելով AEB Mobile/ Online համակարգերով ու ինքնասպասարկման տերմինալների միջոցով մատուցվող ծառայությունների ցանկը, որոնք ընդգրկում են բանկում առավել հաճախ մատուցվող ծառայությունների հիմնական ցանկը: Մասնավորապես, AEB Mobile/ Online համակարգերով սպասարկվող հաճախորդների  քանակը վերջին 2 տարվա ընթացքում ավելացել է մոտ 3 անգամ, իսկ օնլայն հարթակում իրականացվող գործարքների քանակը նույն ժամանակահատվածում աճել է ավելի քան 2,5 անգամ: Բանկը հագեցած է նոր սերնդի բանկոմատների լայն ցանցով, տարադրամի փոխանակման և կանխիկի մուտքագրման տերմինալներով, և նշված ինքնասպասարկման սարքերով վերազինված է բանկի ողջ մասնաճյուղային ցանցը:

Նոր ծրագրային լուծումների և բիզնես-գործընթացների օպտի­մա­լացման շրջանակում էական նշանակություն ենք տալիս հաճախորդների սպասարկման ժամանակի կրճատմանը, աշխատակիցների աշխատաժամանակի ավելի արդյունավետ օգտագործմանը: Նմանօրինակ լուծում է բանկի թիմի կողմից մշակած, ներդրված ու շարունակաբար կատարելագործվող վարկավորման գործընթացը կառավարող ծրագրային համակարգը, որը հնարավորություն է տալիս ամբողջությամբ ավտոմատացնելու վարկավորման հայտերի ուսումնասիրման և վարկի տրամադրման գործընթացը:

Նախորդ տարի ձեռք բերեցինք քարտերի տվյալների անհատականացման նոր սարքավորումներ, որոնց միջոցով հնարավորություն ունեցանք թողարկելու պրեմիում դասի մետաղական քարտեր, ինչպես նաև ուղղաhայաց դիզայնով այլ քարտեր: Միևնույն ժամանակ, շարունակում ենք վերազինել հիմնական և պահուստային տվյալների մշակման կենտրոնները, ինչը հնարավորություն է տալիս ապահովելու մի կողմից բանկի անընդհատ և անխափան աշխատանքը, մյուս կողմից՝ մատուցվող ծաայությունների քանակական աճն ու արագությունը:

Մի քիչ էլ խոսենք պլանների մասին…

Շարունակելով նոր թվային տեխնոլո­գիա­ների ներդրման գործ­ընթացը՝ առանձնահատուկ շեշ­տը դնելու ենք սպասարկման գործիքակազմում ժամանա­կա­կից ծրագրային լուծումների կատարելագործման և տեխնիկական վերազինման աշխատանքների վրա: Այդպիսի նախագծերից է այժմ ներդրման փուլում գտնվող էլեկտրոնային ստորագրությունների համակարգը, որը էականորեն բարձրացնում է հաճախորդի սպասարկման հարմարավետությունն ու խնայում ժամանակը: 

Նոր սերնդի բան­կո­մատ­ների ձեռք­բերումը, ինքնասպասարկման տերմինալ­ների և տերմինալ-փոխարկիչների քանակի ավելացումը, նրանց միջո­ցով, ինչպես նաև AEB Mobile/ Online հա­մա­կարգերում նոր հնա­րավո­րութ­յուն­ների և մատուցվող ծառա­յութ­յունների շրջանակի ավելացումը բանկի շարունակական զարգացման նախագծերից են, որոնք հնարա­վորություն են տալիս բարելավելու հա­ճա­խորդների սպասարկման որա­կը և բարձրացնելու Բանկի ներ­կա­յաց­վածությունը շուկայում:

Առաջիկայում նախատեսում ենք հանդես գալ մի քանի նոր պրոդուկտներով և լուծումներով՝ «AEB Rewards» (հաճախորդների հավատարմության ծրագրի ին­տեգ­րում), AEB Mobile հա­մա­կար­գում բիո­մետրիկ նույնականացման ծրագրի ներդրում և թվային բանկի շատ այլ հետաքրքիր նախագծերով, որոնց մասին դեռ կխոսենք:

Հետագայում նախատեսում ենք, որպես բանկային տեխնոլոգիա, ինտեգրել նաև արհեստական ինտելեկտը հաճախորդի վարկային պատմության ՝ սքորինգի գնահատման և օնլայն նույնականացման գործընթացի մեջ, որի ուսումնասիրման աշխատանքներն արդեն իսկ նախաձեռնվել են բանկի թիմի կողմից, իսկ հետագայում՝ նաև չաթ-բոտերի մեջ, որոնք լուծում են հաճախորդների խնդիրները՝ իրական ժամանակում տրամադրելով անհրաժեշտ տեղեկատվություն:

Ամփոփելով հանգում ենք այն մտքին, որ մարդկային բանականությունն անընդհատ փորձում է իր կյանքը հեշտացնել նոր լուծումներով, նոր տեխնոլոգիաներով, արհեստական բանականությամբ և մենք էլ, որպես բանկ, բնականաբար, հետ չենք մնում այս օրինաչափությունից: Շարունակելու ենք մնալ մեր տեսլականին հավատարիմ՝ ձգտելով մշտապես ֆինանսական շուկայում հանդես գալ նորարար և առաջադեմ բանկային ծառայություններով, վայելել հաճախորդների վստահությունն ու հավատարիմ մնալ բանկի սկզբունքներին: