Դի Մարիան չի կարողացել զսպել արցունքներն Արգենտինայի հետ Կոպա Ամերիկայի եզրափակիչ դուրս գալուց հետո (լուսանկար)

Արգենտինայի հավաքականի կիսապաշտպան Անխել Դի Մարիան լաց է եղել 2024 թվականի Կոպա Ամերիկայի եզրափակիչ դուրս գալուց հետո խառը գոտում լրագրողների հետ զրուցելիս:

Անխել Դի Մարիան ավելի վաղ հայտարարել էր, որ Ամերիկայի գավաթի խաղարկությունից հետո կավարտի միջազգային կարիերան:

Կոպա Ամերիկա-2024-ի եզրափակչում Արգենտինայի հավաքականը հուլիսի 14-ի լույս 15-ի գիշերը կհանդիպի Ուրուգվայ-Կոլումբիա զույգի հաղթողի հետ։ Այդ խաղը Դի Մարիայի համար վերջինը կլինի ազգային թիմի կազմում:

Հիշեցնենք, որ արգենտինացիներն Ամերիկայի գավաթի գործող հաղթողներն են։ 2021 թվականին Բրազիլիայում անցկացված մրցաշարի եզրափակչում Արգենտինան հենց դի Մարիայի գոլի շնորհիվ նվազագույն 1։0 հաշվով հաղթեց Բրազիլիային։