Թուրքիայի նախագահը հույս է հայտնել, որ Հայաստանի և Ադրբեջանի միջև շուտով խաղաղության համաձայնագիր կստորագրվի
Թուրքիայի նախագահ Ռեջեփ Թայիփ Էրդողանը ՆԱՏՕ-ի գագաթնաժողովին հաջորդած մամուլի ասուլիսի ժամանակ անդրադարձել է նաև Հայաստան-Ադրբեջան հարաբերություններին:
«Արմենպրես»-ի փոխանցմամբ՝ այս մասին նշված է թուրքական «Անադոլու» լրատվական գործակալության հրապարակման մեջ:
Ասուլիսի ժամանակ հնչած հարցին, թե հնարավո՞ր է արդյոք Հայաստանի և Ադրբեջանի միջև խաղաղության համաձայնագիր ստորագրվի մինչև այս տարվա վերջ, Էրդողանը պատասխանել է, որ այդ որոշումը պետք է կայացնի Ադրբեջանի նախագահը:
«Մենք ցանկանում ենք, որ այն ստորագրվի, և խաղաղություն տիրի Հայաստանի և Ադրբեջանի միջև։ Հայաստանի վարչապետի հետ մեր հանդիպումներում տեսնում ենք, որ այստեղ ևս դրական քայլեր են արվել»,- նշել է նա՝ ընդգծելով, որ Ադրբեջանի նախագահի հետ հանդիպումների ժամանակ էլ վերջինս կողմ է արտահայտվում, որ դրական քայլեր կատարվեն:
Նկատելով, որ «աշխարհն ու տարածաշրջանը խաղաղության կարոտ են»՝ Էրդողանն ընդգծել է, որ ցանկանում են որքան հնարավոր է շուտ հասնել այդ խաղաղությանը։
The post Թուրքիայի նախագահը հույս է հայտնել, որ Հայաստանի և Ադրբեջանի միջև շուտով խաղաղության համաձայնագիր կստորագրվի first appeared on MediaLab Newsroom-Laboratory.