Казан аэропортында парковка территориясен киңәйтәләр
«Казан» Халыкара аэропортында юл төзергә һәм транспорт чаралары өчен парковка территориясен киңәйтергә җыеналар. Татарстан Премьер-министры вазифаларын башкаручы Рөстәм Нигъмәтуллин моның өчен гомуми мәйданы 98 444 квадрат метр тәшкил иткән тиешле җир участоклары алу турында ТР Министрлар Кабинетының ике карарын имзалаган.
«Габдулла Тукай исемендәге «Казан» Халыкара аэропортында транспорт чаралары парковкасы өчен өстәмә урыннар булган автомобиль юлы» объектын төзү максатыннан Татарстан Республика дәүләт ихтыяҗлары өчен җир алу турындагы тәкъдимне кабул итәргә», - диелә документларда.
Беренче очракта – 55 872 квадрат метрлы участок, икенчесендә 42 572 квадрат метр мәйданлы ике участок (40 870 һәм 1702 квадрат метр) хакында сүз бара. Алар 146 605 квадрат метр мәйданны биләгән бер үк җир участогыннан бүленәчәк.
- Парковка өчен алына торган авыл хуҗалыгы билгеләнүендәге җирләрнең хуҗасы – «Ак Барс - Горизонт» ябык пай инвестицион рента фонды.