Շինծու մեղադրանքների հիման վրա Ադրբեջանը Ռաշիդ Բեգլարյանին դատապարտեց 15 տարվա ազատազրկման
Բաքվի Սաբունչու շրջանային դատարանը հուլիսի 12-ին,շինծու մեղադրանքների հիման վրա,2023 թվականին Աղավնո գյուղի հատվածում ձերբակալված ԼՂ բնակիչ Ռաշիդ Բեգլարյանին դատապարտեց 15 տարվա ազատազրկման:
«Արմենպրես»-ի փոխանցմամբ՝ այս մասին հայտնում են ադրբեջանական ԶԼՄ-ները:
Ըստ դատավճռի՝ Ռաշիդ Բեգլարյանն ազատազրկման առաջին 5 տարին պետք է կրի ազատազրկում՝ բանտում,իսկ 10 տարին` խիստ ռեժիմի գաղութում։
Բեգլարյանին առաջադրվել էին Ադրբեջանի քրեական օրենսգրքի 112 (ազատությունից զրկում միջազգային իրավունքի խախտումով),113 (խոշտանգում),115 (պատերազմի օրենքների և սովորույթների խախտում),279 (օրենքով չնախատեսված զինված խմբավորումներին մասնակցություն) 318 (Ադրբեջանի պետական սահմանի ապօրինի հատում) հոդվածներով շինծու մեղադրանքները:
Նրա ձերբակալելու մասին Ադրբեջանի սահմանապահ ծառայությունը հայտնել էր 2023 թվականի օգոստոսի 1-ին՝ նշելով, թե Բեգլարյանին ձերբակալել են Աղավնո գյուղի հատվածում սահմանը խախտելու պահին։
Ըստ հայկական կողմի՝ Ռաշիդ Բեգլարյանը մոլորվել ու Ադրբեջանի վերահսկողության տակ գտնվող տարածքում է հայտնվել ոգելից խմիչքի ազդեցության տակ։ Նա ադրբեջանցիների կողմից բռնության է ենթարկվել ու առևանգվել ԼՂ-ից Հայաստան տեղափոխվելու ճանապարհին։
The post Շինծու մեղադրանքների հիման վրա Ադրբեջանը Ռաշիդ Բեգլարյանին դատապարտեց 15 տարվա ազատազրկման first appeared on MediaLab Newsroom-Laboratory.