Рөстәм Миңнеханов һәм Сергей Цивилев яшьләр нефть-газ форумы хакатонын ачты

Бүген Әлмәтнең Югары нефть мәктәбе мәйданчыгында халыкара яшьләр нефть-газ форумы кысаларында хакатон ачылды. Тантанада Татарстан Рәисе Рөстәм Миңнеханов, Россия энергетика министры Сергей Цивилев һәм «Татнефть» ГАҖ генераль директоры Наил Маганов катнашты. Бу турыда «Татар-информ» яза.

Ярышларда Россиянең 30дан артык төбәге һәм БДБ илләре университетларыннан 250гә якын студент, аспирант һәм укытучы катнаша.

Алтышар кешедән торган командаларга берләшеп, алар дүрт көн дәвамында түбәндәге дүрт юнәлешнең берсендә мәсьәләне чишү юлларын эзләячәк:

– Нефть һәм газ чыгаруда дөньякүләм технологик лидерлык. Ятмаларның нәтиҗәлелеген арттыра торган яңа карарлар эзләү (технологик процесслар һәм җиһазлар);

- Нефть-газ эшкәртү һәм нефть-газ химиясендә дөньякүләм технологик лидерлык. Технологик процесслар һәм җиһазларның нәтиҗәлелеген арттыра торган яңа карарлар эзләү.

- Индустриаль биотехнологияләр, композит һәм биологик таркала торган материаллар. Гамәлдәге бизнес-юнәлешләрнең тотрыклылыгын арттыру һәм яңаларын үстерү өчен инновацион карарлар.

- Нефть һәм газ секторында цифрлы технологияләр.

Финалистлар һәм җиңүчеләрне акчалата призлар һәм бүләкләр көтә. Гомуми приз фонды 2 миллион сумнан артык тәшкил итә.