Татарстанда барлык төрле маркалы бензин һәм дизель ягулыгы кинәт кыйммәтләнде

Татарстанда агымдагы елның 1-8 июлендә барлык төрле маркалы бензин һәм дизель ягулыгы шактый кыйммәтләнде. Бу Татарстанстат мәгълүматларыннан билгеле булды.

Барыннан да күбрәк АИ-98 һәм аннан югарырак маркалы бензинның бәясе арткан – 81 тиенгә (1,2 процентка), бер литры өчен 69,09 сумнан 69,90 сумга кадәр. АИ-95 маркалы бензин 34 тиенгә (0,6 процентка), бер литры өчен 53,68 сумнан 54,02 сумга кадәр кыйммәтләнгән.

Дизель бәясе исә 19 тиенгә (0,3 процентка), бер литры өчен 60,28 сумнан 60,47 сумга кадәр арткан. АИ-92 маркалы бензинның, үз чиратында, 15 тиенгә (шулай ук 0,3 процентка), 49,70 сумнан 49,85 сумга кадәр кыйммәтләнүе күзәтелә.

Май ае нәтиҗәләре буенча АИ-92 маркалы бензин 2023 елның декабре белән чагыштырганда 0,9 процентка, АИ-95 – 1,0 процентка, АИ-98 һәм аннан югарырак маркалы бензин – 2,6 процентка, ә дизель 0,5 процентка кыйммәтләнгән.

Элегрәк «Татар-информ» хәбәр иткәнчә, Россиядә бер айга (1 августка кадәр) бензин экспортлауга рөхсәт озайтылды.

«Коммерсантъ» газетасы мәгълүматлары буенча, Монополиягә каршы федераль хезмәт ягулыкның биржа бәясе арту шартларында август аенда бензин экспортлауны тыюны гамәлдән чыгармаска тәкъдим итте.