Татарстанда еллык инфляция 8,46 процентка кадәр тизләнде

Июнь аенда Татарстанда инфляция еллык күрсәткечтә 8,46 процентка кадәр артты, май аенда ул 8,43 процентны тәшкил иткән иде. Бу Татарстанстат мәгълүматларыннан билгеле булды.

Бәяләр, май белән чагыштырганда, июньдә 0,64 процентка арткан. Шулай итеп, айлык инфляция, май аендагы 0,76 процент белән чагыштырганда, берникадәр кимегән.

Шул ук вакытта кулланучылар бәяләренең база индексы җәйнең беренче аенда еллык күрсәткечтә 8,72, айлык күрсәткечтә 0,73 процентка арткан.

Май аенда иң ныгы җимеш-яшелчә продукциясе кыйммәтләнгән – елына карата 22,88 процентка һәм узган ай белән чагыштырганда 1,98 процентка.

Шул ук вакытта җимеш-яшелчә продукциясеннән башка азык-төлек товарлары айлык күрсәткечтә 0,69 процентка һәм еллык күрсәткечтә 8,87 процентка арткан.

Хезмәтләр, үз чиратында, май белән чагыштырганда, июнь аенда 1,09 процентка, ә еллык күрсәткечтә 10,55 процентка кыйммәтләнгән.

Июньдә азык-төлек булмаган товарларга аена карата да, елына карата да бәяләрнең иң түбән үсеше күзәтелгән: ул аена карата 0,13 процентны, елына карата 5,34 процентны тәшкил иткән.

Элегрәк Россия Банкында июль аенда төп ставканың 17-18 процентка кадәр артуы мөмкин, дип белдерделәр. Төп ставка 2023 елның 15 декабрендә регулятор аны 15 проценттан 16 процентка кадәр арттырганнан бирле үзгәрмәде.