Жол апатынан үш адам қаза тапқан: жүргізушіге қатысты үкім шықты

Солтүстік Қазақстан облысында сот қарсы жолға шығып, жол апатына себепші болған жүргізушіге қатысты үкім шығарды, - деп хабарлайды Tengrinews.kz тілшісі.
Сот ақпанда Петровка ауылының маңындағы Жезқазған - Петропавл автожолында сотталушы Howo жүк көлігімен келе жатып, жол ережесін бұзып, қарсы қозғалыс жолағына шығып, Toyota Camry жеңіл автокөлігімен соқтығысқанын анықтады.

"Жол апаты салдарынан жеңіл автокөліктің жүргізушісі мен екі жолаушы қаза тапты, қалған екі жолаушы әртүрлі дәрежедегі дене жарақатын алды", - делінген Солтүстік Қазақстан облысы сотының хабарламасында.

Сот мәліметінше, сотталушының кінәсі жәбірленушілер, куәгерлердің айғақтары, сот сараптамаларының қорытындылары, заттай дәлелдемелер және істің басқа материалдарымен дәлелденген.
Айыптаушы тарап жүргізушіні көлік құралдарын басқару құқығынан айыра отырып, 9 жылға бас бостандығынан айыруды сұрады. Сотталушы өз кінәсін мойындамай, ақтауды талап етті.
Нәтижесінде сот ер адамды (Қазақстан Қылмыстық кодексінің 345-бабының 4-бөлігі) кінәлі деп таныды.
Жүргізуші 8 жылға бас бостандығынан айырылды. Ол ең төменгі қауіпсіздік мекемесінде жазасын өтейді. Үкім күшіне енген жоқ.
Сілтемесіз жаңалық оқисыз ба? Онда Telegram желісінде парақшамызға тіркеліңіз!