Հայաստանում սահմանադրական բարեփոխումների հանրաքվեն նախատեսվում է 2027 թվականին
Հայաստանում սահմանադրական բարեփոխումների հանրաքվեն, նոր պայմանավորվածության արդյունքում, նախատեսվում է 2027 թվականին:
«Արմենպրես»-ի փոխանցմամբ՝ այս մասին կառավարության նիստից հետո լրագրողների հետ զրույցում ասաց Արդարադատության նախարար, սահմանադրական բարեփոխումների խորհրդի ղեկավար Գրիգոր Մինասյանը:
Նախարարը վստահեցրեց, որ սահմանադրական բարեփոխումների գործընթացը իր հունով առաջ է շարժվում: Պարզապես ամառային շրջանով պայմանավորված՝ Սահմանադրական բարեփոխումների խորհրդի նիստերը 3 ամիս ոչ այդքան ինտենսիվ էին գումարվում:
«Սահմանադրական հանրաքվեն, նոր պայմանավորվածության արդյունքում, նախատեսվում է 2027 թվականին: Դա նշանակում է, որ այդ բարդ փաստաթղթի վրա աշխատելու ենք մանրամասն՝ հանրային քննարկումներով, նաև բոլոր մասնագետների հետ աշխատելով, ոչ թե հրատապ»,-ասաց Մինասյանը:
Խորհրդի վերջին նիստը եղել է 20 օր առաջ, հաջորդ նիստը տեղի է ունենալու սեպտեմբերի 5-ին: Քննարկվելու է Դանիել Իոաննիսյանի ներկայացրած հարցը:
Սահմանադրական բարեփոխումների խորհուրդը ստեղծվել է վարչապետ Նիկոլ Փաշինյանի որոշմամբ՝ 2022 թվականի հունվարին։ Խորհուրդը պետք է մշակի սահմանադրական բարեփոխումների հայեցակարգի նախագիծ և ներկայացնի վարչապետի աշխատակազմ։
The post Հայաստանում սահմանադրական բարեփոխումների հանրաքվեն նախատեսվում է 2027 թվականին first appeared on MediaLab Newsroom-Laboratory.