Уфа «Нур» театры баш режиссеры һәм актрисасы Салават Юлаев премиясенә дәгъва итә

Уфа «Нур» театрының баш режиссеры Азат Җиһаншин һәм актрисасы Финә Вәлиева язучы Айгөл Әхмәтгалиеваның «Туташ» спектакле белән Башкортстан Республикасының Салават Юлаев исемендәге дәүләт премиясенә тәкъдим ителгәннәр.

Исемлектә аерым-аерым яки төркемләп 12 кандидатура бар. «Матбугатта фикер алышулар 2024 елның 29 августыннан 17 сентябренә кадәр. Бүләкләүләр Башкортстан Республикасы көнендә булачак», дип искәртә «Башинформ».

• Башкортстанда Салават Юлаев исемендәге дәүләт премиясе ел саен бирелә. Барысы 1әр млн. сумлык өч премия бирелә.
• «Туташ» спектакле беренче татар актрисасы Сәхибҗамал Гыйззәтуллина-Волжскаяга багышланган.
• Айгөл Әхмәтгалиева «Туташ» романын актрисаның язмышын өйрәнеп Татарстан Язучылар берлеге грантына язган иде. Соңрак ул аны үзе үк пьеса итеп тә эшләгән.
• Татарстанның атказанган, Башкортстанның халык артисты Финә Вәлиева – Башкортстанның Тәтешле районы Гәрибаш авылыннан.
• Азат Җиһаншин Башкортстанның Баймак районында туган, 10 ел Гафури исемендәге Башкорт дәүләт драма театрында актер булып, соңрак Стәрлетамак башкорт театрларында режиссер, Уфа милли яшьләр театрында директор булып эшли. 2020 елдан – Уфа «Нур» театрының баш режиссеры.

Азат Җиһаншин

Фото: © Салават Камалетдинов