Ձյուդոյի միջազգային ֆեդերացիան սերբ մարզիկին 5 ամսով որակազրկել է խաչակնքվելու համար (տեսանյութ)
Ձյուդոյի միջազգային ֆեդերացիան (IJF) 5 ամսով որակազրկել է սերբ մարզիկ Նեմանյա Մայդովին՝ մենամարտից առաջ խաչակնքվելու համար: Ձյուդոիստի խոսքով՝ ինքը խաչակնքվել է Փարիզի Օլիմպիական խաղերի ժամանակ:
Ինչպես գրում է rbc.ru-ն, այս մասին սոցցանցերում հայտնել է Մայդովը:
«15 օր առաջ ես որոշում եմ ստացել, որ Ձյուդոյի միջազգային ֆեդերացիան ինձ հինգ ամսով որակազրկել է իրենց կրոնական կանոնները խախտելու համար։ Ավելի ճիշտ այն բանի համար, որ ես խաչակնքվել եմ Օլիմպիական խաղերում պայքարի մեջ մտնելուց առաջ»,- գրել է Մայդովը։
Նա նշել է, որ կարգապահական վարույթի ընթացքում հրաժարվել է ներողություն խնդրել խաչակնքվելու համար, սակայն տեղյակ չի եղել, թե ինչ պատիժ է իրեն սպասվում։
Օլիմպիական խաղերում արգելված են կրոնական ժեստերը:
Տեսանյութը կարող եք դիտել Tert.am-ի թելեգրամյան ալիքում: