«Татнефть»тә генераль директорның социаль үсеш буенча яңа урынбасарын билгеләделәр

«Татнефть»тә генераль директорның социаль үсеш буенча урынбасары алмашынды. Компаниядә хәбәр итүләренчә, бу вазифага Ренат Маминны билгеләгәннәр.

Хәбәрдә әйтелгәнчә, Мамин компаниянең социаль өлкәдәге стратегик бурычларына: мәгариф, медицина, мәдәният, спорт, инфраструктура булдыру проектларына кураторлык итәчәк.

Генераль директорның яңа урынбасары 1986 елның 30 декабрендә туган. 2009 елда Дәүләт химия-технология университетын («Ягулык һәм углеводород материаллары химик технологиясе» белгечлеге буенча) тәмамлаган.

Фото: © «Мы Татнефть» телеграм-каналы

«Татнефть»тә Мамин 2009 елдан бирле эшли. Башта ул «ТАНЕКО» нефть эшкәртү заводының күкертле нефтьләрне куу һәм алардан нефтьне беренчел эшкәртү җитештерүе нефть продуктларын эшләп чыгару цехында технологик җайланмалар операторы була. Ике елдан хезмәткәр «ТАНЕКО» кадрлар бүлегенең әйдәп баручы белгече (яшьләр белән эшләү буенча) була.

2012 елда Мамин «Татнефть» кадрлар бүлеге башлыгы урынбасары вазифасына билгеләнә, ә соңрак яшьләр комитеты рәисе була.

Яңа вазифага билгеләнгәнче соңгы алты елда Мамин «Татнефть» хәйрия фонды директоры иде.