Сәрия Сабурская Татарстан Дәүләт Советы депутаты мандатыннан баш тартты

Бүген Казанда ТР Үзәк сайлау комиссиясе утырышында бердәм республика сайлау округы буенча сайланган депутатларны теркәү турында карар кабул ителде. Утырышны ТР Үзәк сайлау комиссиясе рәисе Андрей Кондратьев уздырды.

«Тәкъдим итү һәм теркәүнең төп этапларында, сайлау алды агитациясе, тавыш бирү, нәтиҗә ясау этапларында шикаятьләр һәм кисәтүләр булмады. Бу безнең сайлау системасы һәм иҗтимагый институтларның җитлеккәнлеген күрсәтә», - диде Кондратьев утырышта.

ТР сайлау кодексы нигезендә, сайлауларның гомуми нәтиҗәләре рәсми рәвештә чыкканнан соң, республика Үзәк сайлау комиссиясе Татарстан парламентының сайлап алынган депутатларын терки, аларга җиденче чакырылыш Татарстан Дәүләт Советы депутаты итеп сайлану турында таныклыклар бирә.

Бер мандатлы сайлау округларында сайланган Дәүләт Советы депутатларын теркәү турында карарны округ сайлау комиссияләре кабул итә.

Татарстан Дәүләт Советы депутаты, Татарстан Республикасында кеше хокуклары буенча вәкаләтле вәкил Сәрия Сабурская мандаттан баш тарту сәбәпле, ул «Бердәм Россия» партиясе кандидатларының республика исемлегендә чират тәртибендә киләсе урында булган Данис Шакировка тапшырылды.