Алматыдағы барахолка аумағында өрт шықты
Алматыдағы барахолка аумағында өрт шықты, - деп хабарлайды Tengrinews.kz тілшісі. Бұл туралы Алматының Төтенше жағдайлар департаменті хабарлады.
"18 қыркүйекте сағат 13:26-да Бөкейханов көшесі, 506/1 мекенжайы бойынша өрт туралы хабарлама келіп түсті. Алматы ТЖД күштері мен құралдары жоғары ранг бойынша жіберілді.
Оқиға орнына барған соң сағат 13:35-те өрт ауданы 150 шаршы метрден асатын қоймаға ауысып, екі қабатты үй-жай жанып жатқаны анықталды", - деп хабарлады Алматы ТЖД баспасөз қызметі.
Айта кетейік, осы мекенжай бойынша, 2GIS картасында "Барыс" базары көрсетілген.
Өрт 13:50-де ауыздықталды.
Төтенше жағдайлар департаменті жеке көліктердің өрт сөндіру техникасына кедергі жасағанын хабарлады. Оларды эвакуаторлармен алып тастауға тура келген. Оқиға орнына полиция қызметкерлері де барды.
Кейін екі қабатты асхана отқа оранғаны белгілі болды.
"Қойма үй-жайларынан тауарлық-материалдық құндылықтар эвакуацияланды, өрттің таралу қаупі жойылды", - деп хабарлады Алматы Төтенше жағдайлар департаменті.
Сілтемесіз жаңалық оқисыз ба? Онда Telegram желісінде парақшамызға тіркеліңіз!