2025 елга Татарстан бюджеты беренче укылышта 13,5 миллиард сум дефицит белән кабул ителде
2025 елга Татарстан бюджеты керемнәре 425,5 миллиард сум, ә чыгымнары 439 миллиард сум күләмендә фаразлана. Дефицит 13,5 миллиард сумны тәшкил итәчәк. Татарстанның 2025 елга һәм 2026 белән 2027 еллар планлы чорына бюджеты турындагы закон проектын ТР Дәүләт Советының дүртенче утырышында беренче укылышта кабул иттеләр, дип яза «Татар-информ».
Республиканың киләсе елга консолидацияләнгән бюджетының керем өлеше 512,1 миллиард сум, чыгым өлеше 525,6 миллиард сум, дефицит 13,5 миллиард сум күләмендә планлаштырыла, дип сөйләде ТР финанслар министры Радик Гайзатуллин.
Табышка салым 128 миллиард сум күләмендә килер, дип көтелә. Физик затлар кеременә салым республиканың консолидацияләнгән бюджетына 186 миллиард сум, ә бюджетка 130,2 миллиард сум күләмендә керәчәк. «Салым буенча исәп-хисаплар хезмәт өчен түләүнең фаразланган фондыннан, салым керемнәренең быел көтелгән суммасыннан һәм аның планлаштырылган чорда үсеш темпларыннан чыгып башкарылды», - дип аңлатты ул.
Консолидацияләнгән бюджетка керәчәк акцизлар 45 миллиард сумны тәшкил итәчәк (республика бюджетына – 43,4 миллиард сум). Оешмалар милкенә салым 41,6 миллиард сум күләмендә фаразлана.
2025 елда консолидацияләнгән бюджетның салым булмаган керемнәре 29,7 миллиард сум булыр, республика бюджетының салым булмаган керемнәре 24 миллиард сумны тәшкил итәр, дип көтелә.
Финанс министрлыгы башлыгы билгеләп үткәнчә, әлегә федераль казнадан бюджетара трансфертлар билгеләнмәгән. Бу акчаларның суммасы РФ бюджеты расланганнан соң билгеле булачак.
ТР икътисад министры Мидхәт Шаһиәхмәтов Россия хөкүмәте федераль проектларны формалаштыру эшен төгәлли, дип өстәде. Аларның составына 19 яңа илкүләм проект керәчәк.
«Россия Президенты куйган бурычларга ирешү максатыннан эшләүче федераль проектлар чараларының максатчан күрсәткечләре, паспортлар эшләнде. Министрлык федераль коллегалары белән яңа илкүләм проектларга республика объектларын һәм чараларын кертү мәсьәләләрен карый», – дип хәбәр итте ул.
2025 елга бюджетның беренче проекты белән чагыштырганда, тәкъдим ителгән документта керемнәр 25 миллиард сумга, чыгымнар 39 миллиард сумга арттырылган, дип белдерде ТР Дәүләт Советының Бюджет, салымнар һәм финанслар комитеты рәисе Леонид Якунин.
«Бюджет проекты социаль йөкләмәләрне үтәү өчен ресурсларны стратегик туплаудан гыйбарәт. Татарстан Рәисе Рөстәм Миңнеханов юлламасында куелган бурычлар исәпкә алынды. Бюджет баланслы, заманча чынбарлыкка һәм җәмгыять таләпләренә җавап бирә», - дип ассызыклады ул.
Депутат сүзләренчә, беренче чираттагы һәм социаль әһәмияткә ия булган чыгымнарга бюджет структурасында 86 процент туры килә. «Моңарчы беркайчан да алай булганы юк иде», – диде ул.
Фикер алышу азагында ТР Дәүләт Советы Рәисе Фәрит Мөхәммәтшин билгеләп үткәнчә, бюджет проекты бик җентекләп каралган. «Документ балансланган. Аны тормышка ашырып булачагына ышанабыз», – дип йомгаклады ул.
2026 елга республика бюджеты керемнәре 451,1 миллиард сум, чыгымнары 464,2 миллиард сум, дефицит 13 миллиард сум булыр, дип планлаштырыла.
2027 елга төбәк бюджеты керемнәре 474 миллиард сум, чыгымнары 486,5 миллиард сум, ә дефицит 12,4 миллиард сум күләмендә фаразлана.
Закон проектына 1 ноябрьгә кадәр төзәтмәләр кертергә мөмкин.