ბუდანოვი: უკრაინის წინააღმდეგ საბრძოლველად ჩრდილოეთ კორეის 11 ათასი ჯარისკაცი იგზავნება
„ისინი 1 ნოემბრისთვის იქნებიან მზად,“ განაცხადა ბუდანოვმა The War Zone-ისთვის მიცემულ ინტერვიუში.
რუსეთი უარყოფს კორეის სახალხო-დემოკრატიული რესპუბლიკის რაიმე სახით მონაწილეობას უკრაინის წინააღმდეგ ომში.
გუშინ ბრიუსელში ვიზიტისას უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის წინააღმდეგ შეიძლება ამოქმედდეს 10 ათასი ჩრდილოკორეელი ჯარისკაცი.
ბუდანოვი ამბობს, რომ ჩრდილოეთ კორეის ჯარები რუსეთის აღჭურვილობასა და საბრძოლო მასალას გამოიყენებენ. მისი თქმით, 2600-კაციანი პირველი ჯგუფი თითქოს გაემგზავრება კურსკის ოლქში, რომლის ნაწილი უკრაინის ჯარებმა დაიკავეს აგვისტოში.
სამხრეთმა კორეამ პარასკევს განაცხადა, რომ ჩრდილოეთ კორეის ჯარების რუსეთში გაგზავნა სერიოზულ მუქარას წარმოადგენს საერთაშორისო უსაფრთხოებისთვის და რომ სეული ყოველი ხელმისაწვდომი საშუალებით მოახდენს რეაგირებას. ამის შესახებ ლაპარაკია ქვეყნის პრეზიდენტის ადმინისტრაციის განცხადებაში.