ՔՊ վարչության նիստում Փաշինյանն ինքն իրեն քննադատել է, ինձնից սկսած՝ բոլորից դժգոհություն կա. Հրաչյա Հակոբյան
Այս վեց տարիների ընթացքում խնդիրներ միշտ եղել են, կուսակցության ներսում մենք միշտ քննարկել ենք տարբեր խնդիրներ: Այս մասին ԱԺ-ում հայտարարեց «Քաղաքացիական պայմանագիր» կուսակցության պատգամավոր Հրաչյա Հակոբյանը՝ անդրադառնալով երեկ տեղի ունեցած ՔՊ վարչության նիստին:
Հարցին՝ ինքը դժգո՞հ է Անդրանիկ Քոչարյանից, նա արձագանքեց. «Մամուլից եմ իմացել, թե դժգոհ եմ Անդրանիկ Քոչարյանից ու նախաձեռնել եմ ինչ-որ գործընթաց»:
Նա նշեց, որ երեկ կուսակցության վարչության նիստում քննարկել են տարբեր ներթիմային հարցեր, բայց էթիկապես ճիշտ չի համարում այդ մասին բարձրաձայնելը: Նա նաև հավելեց, որ քննարկման արդյունքում որոշում չի կայացվել:
Հարցին՝ հրաժարականներ չե՞ն լինելու, նա պատասխանեց. «Ես չունեմ որևէ ազդակ, որ նմանատիպ գործընթացներ կարող են լինել»:
Ճշտող հարցին՝ Անդրանիկ Քոչարյանից թիմում դժգոհութուն կա՞, թե՝ ոչ, նա ասաց. «Ինձնից սկսած՝ բոլորից դժգոհություն կա»:
Ինչ վերաբերում է հարցին, թե արդյոք նիստի ժամանակ քննադատություն հնչել է Փաշինյանի հասցեին, Հակոբյանն ասաց. «Փաշինյանն իր խոսքում քննադատել է ինքն իրեն»:
Հակոբյանը տեղեկացրեց, որ ներիշխանական կոռուպցիոն դրսևորումների վերաբերյալ ևս քննարկումներ եղել են, սակայն դարձյալ մանրամասներ չհայտնեց: