Հիմնանորոգվում է Ճամբարակի Թթուջուր բնակավայրը Բերդի տարածաշրջանի հետ կապող ճանապարհը

Հիմնանորոգվում է Հ-38, /Հ-30/ (Թթուջուր) – /Հ-36/ (Նավուր) հանրապետական նշանակության ավտոճանապարհի մի հատվածը։

15.1կմ երկարությամբ ճանապարհահատվածն անցնում է Գեղարքունիքի մարզով։ Ճանապարհը միացնում է Ճամբարակի տարածաշրջանի Թթուջուր բնակավայրը Տավուշի մարզի Բերդի տարածաշրջանի հետ։

«Ճանապարհային դեպարտամենտ»-ի փոխանցմամբ՝ շինարարությունը կատարում է «Բիլդեր քոնսթրաքշն» ՍՊԸ-ն, տեխնիկական հսկողությունը՝ «Ռ Քոնսալթ» ՍՊԸ-ն։

Նշվում է, որ ճանապարհի մոտ 10կմ հատվածում արդեն իսկ տեղադրվել է ասֆալտբետոնե ծածկի ներքին շերտը, 7կմ-ում՝ վերին շերտը։ Այդ հատվածում իրականացվում են կողնակների լրացման, արգելափակոցների տեղադրման աշխատանքներ։ Ճանապարհի մյուս հատվածներում կատարվում են հողային պաստառի կառուցման, խճավազային շերտի տեղադրման, գաբիոնային պատերի կառուցման և այլ բնույթի աշխատանքներ։

Հիմնանորոգումը կատարվում է ՀՀ պետական բյուջեի միջոցներով։