ესპანეთში უამინდობის და წყალდიდობის მსხვერპლის რიცხვი 200-ს გასცდა
თავდაცვის მინისტრის, მარგარიტა რობლესის თქმით, კატასტროფის რეგიონში დამატებით იგზავნება 500 სამხედრო, რომლებიც სამაშველო და სამძებრო სამუშაოებში მონაწილე ძალებს, 1200 მაშველს, დაეხმარებიან. საჭიროების შემთხვევაში, მათი რიცხვი გაიზრდება, თქვა რობლესმა. სამძებრო სამუშაოებში იყენებენ დრონებს, ასევე საგანგებოდ გაწვრთნილ ძაღლებს.
განსაკუთრებით დიდი ზარალი ნახა ვალენსიის რეგიონმა, ასევე ანდალუსიის არაერთმა არეალმა. ესპანეთის ქალაქებში წყალდიდობა გამოიწვია ქარიშხალმა სახელწოდებით „დანამ,“ რომელსაც ახლდა კოკისპირული წვიმა.
ძლიერი წვიმა, რომელსაც წყალმოვარდნა მოჰყვა, 29 ოქტომბერს დაიწყო. წყალდიდობამ დაანგრია და დააზიანა საცხოვრებელი სახლები და სხვა შენობები, გზები, ხიდები, ელექტროგადამცემი ხაზები და სხვა ინფრასტრუქტურა. ადიდებულმა მდინარეებმა დასახლებული პუნქტები ლაფით და ნაგვით აავსეს. ადგილობრივი აქტივისტები ხელისუფლებას ადანაშაულებენ უუნარობაში, გამკლავებოდა სიტუაციას. საზოგადოებრივი ორგანიზაციები 9 ნოემბერს ვალენსიაში გეგმავენ საპროტესტო აქციას. ორგანიზატორების მტკიცებით, ადგილობრივმა ხელისუფლებამ დაგვიანებით გააფრთხილა მოსახლეობა, რამაც გამოიწვია მსხვერპლის დიდი რაოდენობა.