WSJ: რუსეთი ეჭვმიტანილია თვითმფრინავებში ხანძრების გაჩენის მცდელობაში
ამერიკული გამოცემის წყაროთა ინფორმაციით, რუსეთის სამხედრო დაზვერვის საიდუმლო ოპერაციის ნაწილი იყო ორი მოწყობილობის გაგზავნა გერმანული საკურიერო კომპანია DHL-ის მეშვეობით.
2024 წლის ივლისში, ამ კომპანიის ლოგისტიკურ ცენტრებში გერმანიის ქალაქ ლაიფციგსა და დიდი ბრიტანეთის ქალაქ ბირმინგემში ცეცხლი გაუჩნდა ორ ამანათს. გამოძიების თანახმად, ეს იყო აალებადი სითხის შემცველი მასაჟის ელექტრონული მოწყობილობები, რომლებიც განკუთვნილი იყო ჩრდილოეთ ამერიკაში გასაგზავნად.
The Wall Street Journal-ის წყაროთა ინფორმაციით, ამ მოწყობილობებს ხანძარი უნდა გამოეწვია ამერიკის შეერთებული შტატებისა და კანადისკენ მიმავალ თვითმფრინავებში.
დასავლეთის სპეცსამსახურების თანახმად, ორი ამანათის გაგზავნა იყო ერთგვარი ტესტი იმის დასადგენად, როგორ შეიძლება თვითმფრინავებში აალებადი მოწყობილობების შეტანა.
2024 წლის ოქტომბერში პოლონეთის პროკურატურამ გამოაცხადა, რომ DHL-ის საწყობებში ხანძრის ფაქტზე დააკავა ოთხი პირი, რომლებსაც ბრალად ედება უცხოეთის დაზვერვის დავალებით ტერორისტულ ოპერაციებში მონაწილეობა. ვარშავაში განაცხადეს, რომ სხვა ქვეყნებთან თანამშრომლობენ კიდევ ორი ეჭვმიტანილის დასაკავებლად.
პოლონეთის საგარეო დაზვერვის სამსახურის ხელმძღვანელმა პაველ შოტამ The Wall Street Journal-ს განუცხადა, რომ რუსეთის პოლიტიკური ლიდერები სავარაუდოდ, არც აცნობიერებენ, რომ თვითმფრინავში რომელიმე ამანათის აფეთქება მასობრივ მსხვერპლს გამოიწვევდა.
კრემლი ბრალდებას უარყოფს. პრეზიდენტ პუტინის პრესმდივანმა დმიტრი პესკოვმა ამერიკულ გამოცემას უთხრა, რომ ეს ცნობები მასმედიის ტრადიციული ინსინუაციებია.