Ալեն Սիմոնյանը Վիետնամի Կոմկուսի Կենտկոմի գլխավոր քարտուղարի հետ քննարկել է երկու երկրների միջև սերտ գործակցությանն առնչվող հարցեր
Պաշտոնական այցով Վիետնամում գտնվող ՀՀ ԱԺ նախագահի գլխավորած պատվիրակությունը հանդիպել է Վիետնամի Սոցիալիստական Հանրապետության իշխող Կոմունիստական կուսակցության Կենտկոմի գլխավոր քարտուղար Տո Լամի հետ: Հայ-վիետնամական հարաբերություններին վերաբերող համակողմանի քննարկումների արդյունքում Տո Լամը վստահություն է հայտնել, որ ՀՀ ԱԺ նախագահի այցը նոր թափ կհաղորդի առաջիկայում երկկողմ ավանդական բարեկամության եւ բազմակողմ համագործակցության ամրապնդմանը: Այս մասին հայտնում են ԱԺ-ից:
Ալեն Սիմոնյանն էլ իր հերթին նշել է, որ Վիետնամն առանձնահատուկ երկիր է Հայաստանի համար ու հավելել, որ մեր երկու երկրների միջև գոյություն ունեն սերտ կապեր՝ հիմնված փոխադարձ վստահության, ավանդական եւ մշակութային կապերի վրա:
Կողմերն ընդգծել են նաև փոխադարձ զբոսաշրջության կարևորությունը՝ նշելով, որ այն տնտեսական օգուտների հետ մեկտեղ խթանելու է նաև մարդկանց միջև շփումները: Այդ համատեքստում կարևորվել է նաև երկու երկրների միջև ուղիղ չվերթների հարցը:
Անդրադարձ է կատարվել նաև մեր տարածաշրջանային զարգացումներին, և Ալեն Սիմոնյանը Տո Լամին է ներկայացրել «Խաղաղության խաչմերուկ» նախագիծը: