Վերջին 40 տարվա ընթացքում Իրաքում առաջին ազգային մարդահամարն է անցկացվում
Իրաքը անցկացնում է համապետական մարդահամար: Այս երկրում ժողովրդագրական տվյալների հավաքագրում 1987 թվականից ի վեր, երբ արդեն Սադամ Հուսեյնն իշխանության էր, չէր իրականացվել: Այս մասին գրում է aljazeera.com-ը:
Այդ առիթով ներքին գործերի նախարարությունը պարետային ժամ է հայտարարել: Երկու օրում 120 հազար հետազոտողները երկրի բոլոր 18 նահանգների տնային տնտեսությունների մասին տվյալներ կհավաքեն:
Պլանավորման նախարարության խոսնակ Աբդուլ-Զահրա Ալ-Հինդավին հայտարարել է, որ ՄԱԿ-ի Բնակչության հիմնադրամի (ՄԱԲՀ) հետ համատեղ անցկացված մարդահամարը ցույց կտա Իրաքի իրականությունն ամենափոքր մանրամասնությամբ, ինչը թույլ կտա իշխանություններին բացահայտել առողջապահության, կրթության և բնակարանային ապահովման բացերը: