Мошенниклар салым хезмәте исеменнән шалтыратып, кешеләрдән акча урлый башлаган
Явыз уйлы җинаятьчеләр, салым хезмәте булып кыланып, Россиядә яшәүчеләрнең акчаларын урлый башлаган. Алар кешеләргә акчаларын декларацияләргә тәкъдим итә. Бу турыда РИА Новости Мәскәү прокуратурасына сылтама белән яза.
71 яшьлек пенсионер хатын шул рәвешле ике миллион сумнан артык акчасын югалткан. Аңа билгесез кеше шалтыраткан. Хатын-кыз акчаларын өйдә саклый икәнен белгәч, бу кеше аны барлык «декларацияләнмәгән акчаларны» салым хезмәте тартып алачак, дип ышандырырга тотынган.
Хатын-кыз кодлы сүз уйлап тапкан, аны курьер белән очрашкач кулланган һәм аңа бөтен акчасын тапшырган. Алданган хатынга исә фотошопта ясалган ялган килешү тоттырганнар.