Фәрит Мөхәммәтшин: БРИКС саммитыннан соң Татарстанның абруе халыкара дәрәҗәдә күтәрелде

Казанда БРИКС саммитын уздырганнан соң Татарстанның абруе халыкара дәрәҗәдә күтәрелде. Бу хакта Татарстан Дәүләт Советы Рәисе Фәрит Мөхәммәтшин республика парламенты президиумы утырышында белдерде, дип яза «Татар-информ» хәбәрчесе Надежда Гордеева.

«22-24 октябрьдә Казанда БРИКСның 16нчы саммитын уңышлы уздырдык. Без Россия Президенты Владимир Путинга республикага мондый ышанычы өчен рәхмәт белдердек, уңай җавап алдык. Иң мөһиме, Татарстан халыкара дәрәҗәдә популярлаша һәм таныла бара», - диде Татарстан Дәүләт Советы Рәисе.

Фәрит Мөхәммәтшин билгеләп үткәнчә, БРИКС саммитына Татарстан башкаласына 36 илдән делегация килгән. «Минем яныма саммитта булган кешеләр килде: «Рәхмәт, БРИКС бик оешкан төстә узды», – диделәр», – дип белдерде ул.

Парламент җитәкчесе саммит уздыру чорында Татарстан Дәүләт Советы мәйданчыгында «Татарстанда эшләнгән» күргәзмәсе оештырылуын искәртте. Анда республикада эшли торган 60 компания үз продукциясен тәкъдим итте. «Күргәзмәдә 2 меңнән артык кеше булды һәм бик югары бәя бирде», - дип йомгаклады ул.