Казанның Вахитов суды «Татфондбанк»ның элекке башлыгы Мусинга карата хөкем карары чыгарды

Казанның Вахитов район суды «Татфондбанк»ның элекке идарә рәисе Роберт Мусинга карата хөкем карары чыгарды. Аны вәкаләтләреннән явызларча файдалануда гаепле дип таптылар. Бу турыда «Татар-информ» яза.

«Гаепле дип табарга һәм 6,5 елга иректән мәхрүм итү рәвешендәге җәза билгеләргә, коммерция оешмаларында ике елга җитәкче вазифалар биләүне тыярга. Җәза срокларын кушкач, җитәкче вазифалар биләүне өч елга тыеп, 12,5 ел билгеләргә», - диде судья.

«Татфондбанк»ның элекке башлыгы Роберт Мусин соңгы сүзендә аны инде гаепле дип табылган җинаятьләр өчен җаваплылыкка тартуларын әйтте.

Искәртеп узабыз, өч ел элек ике эпизод - «Аида и Д» фирмасына һәм «Казан авыл хуҗалыгы техникасы»на законсыз рәвештә кредитлар бирү - буенча чыгарылган хөкем карарында суд, срогы тәмамлану сәбәпле, җинаять эзәрлекләвен туктатты. Вәкаләтләрне арттыруда калган дүрт эпизод буенча Мусинны гаепле дип таптылар.

DOMO компанияләр төркеменә кредитлар бирү белән бәйле җинаять өчен суд аңа 8 ел да 6 айга гомуми режимлы колония билгеләде. «Бинбанк»ның кредит портфеленә ташлама ясаган өчен – 2 ел да 9 ай, РФ Үзәк банкы белән эпизод өчен – 3,5 ел, ТФБ бөлгенлеккә төшәр алдыннан залогларны чыгарган өчен 6 ел билгеләнде.

Срокларны кушканнан соң йомгаклау карары 12 ел колония булды, әмма бер елдан соң 2022 елда Мусин хөкем карарына карата шикаять бирде һәм җәза срогын 12 елдан 11 елга кадәр киметүгә иреште. Хәзер аны башка компанияләр белән кылган шундый ук җинаятьләр өчен хөкем иттеләр.