روسۍ محکمې له کورسک د تېرېدو پر مهال د یوه فرانسوي تلوېزیوني چینل د خبریالې د نیولو حکم ورکړی
رویټرز خبري آژانس نن د لیندۍ ۶مه د روسیې د تاس خبري آژانس په حواله خبر ورکړ چې د فرانس ۲۴ تلوېزیوني چینل دا خبریاله د اوکراین له پوځ سره دې سیمې ته ننوتې وه.
روسیې د هغو لوېدیځو خبریالانو پر وړاندې جنايي دوسیې پرانیستې دي چې له کورسک څخه راپورونه ورکوي.
کورسک د روسیې هغه سیمه ده چې اوکراین د سږني کال په اګست میاشت کې د هغې ۱۴۰۰ مربع کیلومتر ساحه ونیوله.
د تارس د خبر له مخې، په محکمو کې دا قضیې په غیابي ډول څېړل کېږي او که دا خبریالان د روسیې قلمرو ته ننوځي، نو وبه نیول شي.