რუსეთის დაჯგუფება „სამხრეთის“ სარდლის მოვალეობის შემსრულებლად დაინიშნა გენერალი ალექსანდრ სანჩიკი
2020 წლიდან სანჩიკს ეკავა აღმოსავლეთის სამხედრო ოლქის 35-ე გაერთიანებული არმიის მეთაურის თანამდებობა, ხოლო მიმდინარე წლის 15 მაისს იგი რუსეთის პრეზიდენტთან შეხვედრას დაესწრო როგორც აღმოსავლეთის სამხედრო ოლქის მეთაურის მოვალეობის შემსრულებელი, აღნიშნავს RBC.
პუბლიკაცია „მოჟემ ობიასნიტ“ სანჩიკის შესახებ რამდენიმე დეტალს იტყობინება. კერძოდ, გამოცემა წერს, რომ გენერალ-ლეიტენანტი ომის მომხრე ბლოგერებმა უკრაინის ომის დროს არაკომპეტენტურობაში დაადანაშაულეს. 2022 წლის ივნისში ბლოგერებმა დაწერეს, რომ 35-ე არმიამ იზიუმში მძიმე დანაკარგები განიცადა: ჯარისკაცები ბრძოლაში გაგზავნეს აღჭურვილობის, საკომუნიკაციო საშუალებებისა ან სანგრების სათხრელი ნიჩბების გარეშეც კი.
გასულ კვირაში გავრცელდა ინფორმაცია, რომ გენერალ-პოლკოვნიკი გენადი ანაშკინი თანამდებობიდან გაათავისუფლეს დაჯგუფება „სამხრეთის“ სარდლის თანამდებობიდან. RBC-მ ეს ინფორმაცია თავდაცვის სამინისტროს წყაროზე დაყრდნობით გაავრცელა. ინფორმაცია 23 ნოემბერს რუსეთის ომის მომხრე ტელეგრამის არხებმაც გაავრცელეს. RBC-ს წყარომ ეს გადაწყვეტილება „გეგმურ როტაციას“ დაუკავშირა და აღნიშნა, რომ არ არსებობს პრეტენზია თავად ანაშკინის მიმართ, „რომელსაც დიდი საბრძოლო გამოცდილება აქვს“.
ომის მომხრე ბლოგერი იური პოდოლიაკა, რომელიც ერთ-ერთი პირველი იტყობინებოდა გადადგომის შესახებ, წერდა, რომ გენადი ანაშკინმა პოსტი დაკარგა „რუსეთის შეიარაღებული ძალების სარდლობისა და ქვეყნის პოლიტიკური ხელმძღვანელობის სისტემატურად მოტყუების გამო“. პოდოლიაკა ამასთან იმოწმებდა ინფორმაციას იმის შესახებ, რომ დაჯგუფების სარდლობა იტყობინებოდა არარსებული გამარჯვებების შესახებ, განსაკუთრებით სევერსკის მიმართულებით.
რუსეთის არმიაში საკადრო ცვლილებებთან დაკავშირებით ოფიციალური განცხადებები არ გაკეთებულა.