Казаннан Сәет Галиуллин «Голос. Балалар» бәйгесе финалында икенче урын алды
Казаннан 12 яшьлек Сәет Галиуллин «Голос. Балалар» шоуының суперфиналы нәтиҗәләре буенча икенче урын алды. Ул «Березовые сны» җырын башкарды (1978 елгы «Великая Отечественная» документаль сериалыннан) һәм Беренче канал тамашачыларының 42,5 процент тавышын җыйды.
Моңа кадәр сайлап алу туры барышында татарстанлы «Беловежская пуща» җырын җырлады (Александра Пахмутова һәм Николай Добронравов композициясен беренче тапкыр 1976 елда Бэла Руденко башкарган, ә бер елдан соң үзгәртелеп легендар Беларусь коллективы репертуарына кергән).
Фото: © "Голос" шоуы телеграм-каналы
Санкт-Петербургтан Василий Иголкин җиңү яулады, ул Мөслим Магомаевның «Синяя вечность» хитын башкарды (1969 елгы композиция шулай ук «О, море, море» исеме белән билгеле). Аның өчен телевизор караучыларның 45,3 проценты тавыш биргән.
Казанлының суперфинал буенча тагын бер көндәше, Екатеринбургтан Арина Точилова, 1983 елгы «Мэри Поппинс, до свидания» фильмыннан «Ветер перемен» җырын башкарды. Аның чыгышы 12,2 процент тавыш җыйды.
Сәет Галиев JONY командасында, Василий Иголкин Дима Билан командасында, ә Арина Точилова Юлианна Караулова командасында иде. Финалистлар арасында шулай ук Нелли Байматова, Эвелина Радбиль, Анна Кукина, Андрей Прибыльский, Григорий Дружинин һәм Роман Скробот бар иде, ләкин алар сайлап алу турын үтә алмады.
Галиуллин конкурсның өстәмә этабында тамашачыларның 59 процент тавышын җыеп финалга чыкты. Хәрби хор белән ул 1974 елгы «В бой идут одни старики» фильмыннан «Смуглянка» җырын башкарды. Соңрак Татарстан Рәисе Рөстәм Миңнеханов республика халкын якташка «Голос. Балалар» бәйгесендә җиңәргә ярдәм итәргә чакырды.