მიღწეულია შეთანხმება - აქციის მონაწილეებს 20 საათზე საზმაუს პირდაპირი ეთერი დაეთმობა

საზოგადოებრივი მაუწყებლის ადმინისტრაციასა და საზმაუსთან შეკრებილ აქციის მონაწილეებს შორის შეთანხმება შედგა.


დღეს, 30 ნოემბერს, 20 საათზე, საზოგადოებრივი მაუწყებლის პირდაპირი ეთერი დაეთმობა საპროტესტო აქციის 12-მდე მონაწილეს.


პირდაპირ ეთერს გაუძღვება „რეალური სივრცის“ ავტორი და წამყვანი ნინო ზაუტაშვილი. სწორედ ეს მოთხოვნა ჰქონდათ დემონსტრანტებს.


თავდაპირველად, საზოგადოებრივი მაუწყებლის გენერალური დირექტორი მათ სთავაზობდა პირდაპირი ეთერის სხვა ფორმატსა და სხვა წამყვანს, რაზეც აქციის მონაწილეებმა უარი თქვეს.




საზოგადოებრივ მაუწყებელთან აქტივისტები, ჟურნალისტები, პროფესორ-მასწავლებლები, სახელოვნებო დარგების წარმომადგენლები 17 საათისთვის შეიკრიბნენ. ისინი ითხოვენ საზოგადოებრივი მაუწყებლის პირდაპირ ეთერს და გენერალური დირექტორის, თინათინ ბერძენიშვილისა და სამეურვეო საბჭოს თავმჯდომარის, ვასილ მაღლაფერიძის გადადგომას.


არჩევნების სადავო შედეგებთან დაკავშირებულმა საპროტესტო აქციებმა განსაკუთრებით მასშტაბური სახე მიიღო მას შემდეგ, რაც „ქართულმა ოცნებამ“ მიიღო გადაწყვეტილება, 2028 წლის ბოლომდე დღის წესრიგში არ დააყენოს ევროკავშირში გაწევრების მოლაპარაკების გახსნის საკითხი, რაც აუცილებელი ეტაპია ევროკავშირში საქართველოს გაწევრიანებისთვის.