Владимир Путин киләсе атнада Стратегик үсеш советы утырышын уздыра

Киләсе атнада Россия Президенты Владимир Путин Стратегик үсеш һәм илкүләм проектлар советы утырышын уздыра һәм инвалид булган махсус хәрби операция катнашучылары белән очраша. Бу хакта «Москва. Кремль. Путин» программасында әйтелде. Тапшыруның фрагментын аның алып баручысы Павел Зарубин телеграм-каналында урнаштырды.

«Путин инвалид булган махсус операция геройлары белән даими очрашып тора. Халыкара инвалидлар көнендә (3 декабрьдә билгеләп үтелә — Т-и иск.) ул аларның тормыш мәсьәләләре белән шөгыльләнүен дәвам итәчәк» — дип билгеләп үтелде тапшыруда.

5 декабрьдә билгеләп үтелә торган Иреклеләр көнендә РФ Президенты «Ел волонтеры» номинациясендә җиңүчеләр белән аралашачак.

Моннан тыш, киләсе атнада Путин яшь галимнәр белән очраша һәм «Россия чакыра» форумы пленар утырышында чыгыш ясый (форум Мәскәүдә 4 һәм 5 декабрьдә узачак, пленар сессия 4 декабрьдә була).

Моннан тыш, Президент планына шулай ук Минскка сәфәр керә. Биредә «Россия һәм Беларусь Союз дәүләте елына нәтиҗә ясаячак».