Россия Хөкүмәте Татарстанга юлларны ремонтлау өчен өстәмә акча бүлеп бирәчәк
Россия Хөкүмәте илнең тугыз төбәгенә юл инфраструктурасын үстерү өчен өстәмә акча юнәлдерәчәк. Алар арасында Татарстан да бар. Бу хакта Министрлар Кабинеты сайты хәбәр итә.
«Кабул ителгән карар, Төньяк Осетиядәге күперне, Владимирдагы Рпенский юлы корылмасын һәм Мордовиядә Инсар елгасы аша юл үткәргечен реконструкцияләүне дә кертеп, төбәкләрдә төзелеш эшләрен тизләтергә ярдәм итәчәк», - дип искәртте РФ Премьер-министры Михаил Мишустин.
Автомобиль юллары һәм күперләр төзү – «Транспорт системасын үстерү» дәүләт программасын, шулай ук «Имин һәм сыйфатлы юллар» илкүләм проектын гамәлгә ашыру эшенең бер өлеше, дип өстәделәр Министрлар Кабинетында.
Элегрәк Татарстанда Арча – Зур Әтнә – Кушлавыч автомобиль юлының 1,5 километрга якын озынлыктагы участогына ремонт ясалуы хакында хәбәр ителгән иде.