Türkmen pälwany PFL-niň çempiony boldy, $1 million gazandy

Türkmen türgeni, garyşyk söweş sungatynyň ussady Döwletjan Ýagşymyradow orta agramda PFL-niň nobatdaky ýaryş möwsüminiň jemleýji bäsleşiginde ýeňiş gazanyp, PFL-niň Baş baýragyna mynasyp boldy diýip, hökümetçi neşirler habar berdi.


29-njy noýabrdan 30-na geçilen gije Saud Arabystanynyň Er-Riýad şäherinde geçirilen aýgytlaýjy duşuşykda D.Ýagşymyradow amerikaly Impa Kasangana bilen bäsleşip, ynamly ýeňiş gazandy.


Ýaryşyň finalynda sylag hökmünde diňe bir çempionlyk ady däl, eýsem 1 million amerikan dollary möçberinde pul baýragy hem goýuldy.


Bu ýeňiş 35 ýaşly D.Ýagşymyradowyň yzly-yzyna gazanan ikinji üstünligi boldy. Ol 2024-nji ýylyň awgustynda gatnaşan bäsleşiginde Rob Uilkinsondan üstün çykypdy.