زاروبینا امریکا ته د درواغو په ویلو او د روسیې استخباراتو سره د اړیکو په دوام تورنه شوې
"ایفبيآی" همداراز د روسیې له یوې مشکوکې اجنټې سره چې د امنیتي ادارو تر تعقیب لاندې وه، خو له امریکا څخه وتښتېده په اړیکو تورنه کړې ده.
د "ایفبيآی"د تورونو له مخې چې د تېرې نومبر میاشتې په وروستیو کې د نیویارک ښار د یوې جنوبي ولسوالۍ محکمې ته وړاندې شول، مېرمن زاروبینا په ۲۰۲۰م کال کې د روسیې د امنیتي خدماتو د ادارې FSB له خوا استخدام شوې او د الیسا په مستعار نوم یې فعالیت کاوه.
د لګېدلو تورونو له مخې نوموړې په ژورنالیستانو او کارپوهانو کې د تماس د یوې شبکې د جوړولو هڅه کوله او په عین حال کې یې د سایبریا په تومسک ښار کې په خپل پلرني ټاتوبي کې د "ایفایسبي" FSB د یوه افسر په لارښوونه کار کاوه.
زاروبینا اوس مهال د ۲۵زره ډالرو په مالي ضمانت خوشې شوې، خو له نیویارک څخه پر وتلو او د روسیې له چارواکو سره پر تماسونو یې بندیز لګېدلی او خپل پاسپورټ یې هم تسلیم کړی دی.