Краснодар краенда туган тел укытучыларының төбәкара семинары узды
28 ноябрьдә Краснодар краенда Татарстан Республикасы делегациясе катнашында туган тел укытучыларының төбәкара семинары узды. Бу хакта Бөтендөнья татар конгрессының матбугат хезмәте хәбәр итә.
Семинарда катнашучыларны край губернаторының җәмәгатьчелек белән элемтә идарәсе башлыгы урынбасары Рәшит Рәфыйков, Краснодар крае Мәгариф министрлыгының гомуми белем бирү бүлеге башлыгы урынбасары Татьяна Шопенкова, Татарстан Республикасы Мәгариф һәм фән министрлыгы милли мәгариф идарәсенең төбәкара хезмәттәшлек секторы мөдире Гөлия Мусина сәламләде.
Бүгенге көндә крайның алты мәктәбендә төрле форматта татар теле өйрәтелә. Моның нәтиҗәсе дә бар. Елга авылы мәктәбе укучылары татар теле һәм әдәбияты буенча Бөтендөнья олимпиадасында өч ел финалист булды.
Семинар барышында Татарстанның Зур Чынлы һәм Краснодар краеның Елга авылы мәктәпләре арасында хезмәттәшлек турында килешү имзаланды.
Елга авылы мәктәбенең татар теле һәм әдәбияты укытучылары Минера Ишмөхәммәтова һәм Римма Хөснетдинова «Мәгарифтәге казанышлар өчен» күкрәк билгесе белән бүләкләнде.
Туган (татар) тел укытыла торган барлык алты мәктәпнең коллективларына Татарстан Республикасы Мәгариф һәм фән министрлыгының Рәхмәт хатлары тапшырылды.