ABŞ Özbegistanyň öňki resmilerine çagalara edilen zorluk üçin gadaganlyk girizdi

ABŞ-nyň Gazna departamenti Özbegistanyň ozalky wezipeli adamlarynyň üç sanysyna garşy sanksiýa girizdi. Bu gadaganlyk gulçulygyň ýatyrylmagynyň halkara derejesinde bellenilýän gününde, 2-nji dekabrda girizildi.


Ýetimler öýüniň öňki müdiri Ýulduz Hudayberganowa, Horezm sebitiniň adalat bölüminiň öňki başlygy Aýbek Maşaripowa we adatdan daşary ýagdaýlar bölüminiň öňki müdiri Anwar Kurýazowa garşy görlen çäreler olaryň “ýetim çagalaryň fiziki we jynsy zorlugyna gaýta-gaýta gatnaşmaklary, çagalaryň satylmagy” bilen bagly.


ABŞ Gazna departamentiniň daşary ýurt emläklerine gözegçilik gullugynyň (OFAC) habar bermegine görä, Hudaýberganowa kämillik ýaşyna ýetmedik gyzlary 10 aýlap, pul we haryt almagyň deregine, erkekler bilen jynsy gatnaşyk gurmaga mejbur edipdir. Ol gyzlaryň bu talaba boýun bolmagyny gazanmak üçin haýbat atmak, fiziki zorluk, açlyk we izolýasiýa çärelerini ulanypdyr.


Maşaripow we Kurýazow, resminamada aýdylmagyna görä, ýetimler öýüne “sowgat” almak bahanasy astynda, çagalaryň jynsy gatnaşyklar üçin elýeterli bolmagyny gazanmaga çalşypdyr.


Global Magnitskiý kanunynyň çäginde girizilen sanksiýalar ABŞ-a adam hukuklarynyň bozulmagy bilen baglanyşykly adamlara garşy wiza we maliýe çäklendirmelerini girizmäge mümkinçilik berýär.