Күп функцияле үзәктә россиялеләрне биометрия буенча кабул итәргә планлаштыралар
Россиядә күп функцияле үзәкләрдә халыкка паспорт күрсәтмичә хезмәт күрсәтү буенча сынау проекты старт алды. Шәхесен раслау өчен клиентка хезмәткәрнең эш урыны янында урнаштырылган камерага карарга гына кирәк була. Бу хакта Россия вице-премьеры Дмитрий Григоренко аппаратында хәбәр иттеләр.
Биометрия буенча халыкны беренче тапкыр кабул итүне Чиләбе өлкәсендә флагман күп функцияле үзәге үткәрә башлады, ә ел ахырына кадәр шундый ук экспериментны Липецк һәм Ленинград өлкәләрендә эшләтеп җибәрәчәкләр. «Сынау нәтиҗәләре буенча сервисны илнең башка төбәкләренә дә таратачакбыз», — дип китерә РИА Новости Григоренконың сүзләрен.
Яңа форматта эшләгәндә, шәхес расланганнан соң, хезмәт күрсәтүгә алдан тутырылган гариза формалашачак, дип билгеләп үтелә. Бу хезмәт күрсәтүне тизләтергә һәм гадиләштерергә мөмкинлек бирер дип көтелә.
Шул ук вакытта вице-премьер биометрияне ирекле нигездә куллану турында искәртте. Күп функцияле үзәккә килүче хезмәтне нинди форматта алырга теләвен үзе хәл итә.