Ѓорѓиевски: Градоначалници да се отповикуваат на референдум, за да нема нови неуспешни примери
„Ќе треба заедно да се седне и со Министерството за локална самоуправа во наредниот период, да се обединат сите сили околу овој закон. Експертската јавност ќе треба јавно да се вклучи, да се дискутира на таа тема. Отповикувањето, според мене, треба да се врши на начин граѓаните по пат на референдум да можат да отповикаат градоначалник“, ијзави претседателот на Заедницата на единиците на локалната самоуправа (ЗЕЛС), Орце Ѓорѓиевски по форумот на ЗЕЛС „Здружени“ во ставање крај на родово базираното насилство.
Тој потенцираше дека ова е процес во којшто се засегнати градоначалниците, но, како што нагласи, сите тие едногласно го поддржуваат.
„Сите градоначалници го поддржуваме тој процес, затоа што, за жал, во државава освен во моментот што ни се случува во Градот Скопје, имаме и многу други неуспешни примери и приказни од минатото каде што се чекало да поминат четири години за на некого да му заврши мандатот и затоа имаме состојби во кои во 21 век решаваме фекални канализации, населени места се непокриени со водоводна мрежа, немаат градинки, училиште…“, додаде првиот човек на ЗЕЛС.
Нагласи и дека верува во законско решение кое што во перспектива нема да дозволи да се повтори ситуацијата во Градот Скопје.
Јавниот превоз колабираше минатиот месец откако Бирото за јавна набавка го поништи тендерот за набавка на гориво на ЈСП и автобусите останаа во гаражите. Владата на 21 ноември одлучи да интервенира со гориво од државните резерви за привремено да се нормализира јавниот превоз.
Ова не е прв пат, скопјани да имаат проблем со јавниот превоз. Во февруари годинава, за прв пат Скопје остана цел ден без јавен превоз, затоа што вработените во ЈСП стапија во штрајк поради неисплатени плати.
Во неколку наврати главниот град се соочи со проблеми со несобраното ѓубре од контејнерите. Преку протест вработени во јавното претпријатие „Комунална хигиена“ лани во јули бараа повисоки плати и враќање на отпуштени работници, за кои што надлежните тврдеа дека не доаѓале на работа, а земале плата.
Ситуацијата во главниот град тогаш ја разгоре вербалната „војна“ меѓу градоначалничката на Скопје, Данела Арсовска и лидерот на ВМРО-ДПМНЕ, Христијан Мицкоски.
Арсовска стана градоначалничка со поддршка од сега владејачката ВМРО-ДПМНЕ. Оваа партија има има мнозинство во Советот на Град Скопје, а им се разидоа патиштата уште во првата година од мандатот на Арсовска поради несогласување за пречистителната станица.