Од 15 декември ќе поевтинат над 600 производи
Мерката стартува од 15 декември и ќе трае до 15 јануари.
Новогодишната потрошувачка кошничка се состои од листа на прехранбени производи и алкохолни и безалкохолни пијалаци предложени од страна на производителите и трговците кои за време на новогодишните празници ќе им бидат понудени на потрошувачите по ниски цени.
Со неа се очекува намалување на цените на производите за 10 и повеќе проценти.
Листата на производи, како што кажа Мицкоски, е договорена заедно со стопанските комори, синдикатите, производителите, дистрибутерите и трговците.
„Направивме нешто што можеби досега никогаш не е направено - сите заедно разговаравме извесен период и за време на тие разговори дојдовме до компромис. Сите се согласивме во периодот од 15 декември до 15 јануари цените на повеќе од 600 артикли да бидат намалени и брендирани со налепници на кои ќе пишува „Помалку трошоци, повеќе за тебе, се грижиме“, рече Мицкоски на денешната прес-конференција.
Премиерот истакна дека не се работи за интервентна мерка на Владата и со ограничување на цените, туку за консензуално решение поради што нема да има казнување, туку ќе има мониторинг дали на тие производи ќе бидат залепени налепниците за да бидат визибилни за граѓаните.
Од опозициската СДСМ велат дека мерките на Владата, како што е замрзнувањето на маржите кои беа дел од т.н. есенска кошничка, се покажале како неефикасни и немале никакво влијание врз намалување на цените.
„Вистинската мерка која ќе донесе реална корист за граѓаните и реално ќе ги намали цените на производите е укинувањето на ДДВ на храната. Со укинување на ДДВ на храната реално и вистински ќе се намалат цените на повеќе од 250 категории на производи, а домаќинствата ќе можат да заштедат и до 2000 денари месечно“ се наведува во соопштението од СДСМ.
Претходната, есенска кошничка, со која Владата ги ограничи маржите кај 73 производи до 10 проценти, траеше до 31 октомври.
Од 28 септември пак се применува и Законот за нефер трговски практики кој предвидува повеќе од 2500 земјоделски и прехранбени производи да имаат ограничени маржи до 10 отсто.