یوناما: طالبان دې د بشري حقونو نړیوالې ژمنې ومني
په یوه بیان کې چې یوناما نن د بشري حقونو د نړیوالې ورځې په مناسبت رسنیو ته استولی، پر افغانستان له واکمنو چارواکو غوښتنه شوې چې د بشري حقونو نړیوال مکلفیتونه په ټول افغانستان کې د ښځو، نارینه وو، نجونو او هلکانو د اوسنیو او راتلونکو نسلونو د خوندیتوب او هوساینې د کلیدي عنصر په توګه ومني.
په بیان کې د افغانستان لپاره د ملګروملتونو د سرمنشي د ځانګړې استازې روزا اوتونبایووا له قوله ویل شوي دي چې نوموړې وايي، په خواشینۍ سره موږ په افغانستان کې په دوامداره توګه د برعکس وضعیت شاهدان یو.
د نوموړې په وینا د امنیت په برخه کې له ښېګڼې او د وسله وال تاوتریخوالي له کمښت سره سره د بشري حقونو خوندیتوب په اوږدمهال او خطرناک ډول د له منځه تلو په حال کې دی. مېرمن اوتونبایووا وايي د دې وضعیت زیان ښځې او نجونې ګالي.
طالبانو تراوسه د یوناما د راپور په اړه غبرګون نه دی ښودلی خو له دې مخکې یې پرله پسې دا ټینګار کړی چې د افغانانو بشري حقونو د اسلامي شریعت په چوکاټ کې خوندي دي.