რუსეთის მსხვილი სამრეწველო ქალაქებიდან აფეთქებების შესახებ იუწყებიან
დილის შვიდის ნახევრისთვის როსტოვის ოლქის გუბერნატორის მოვალეობის შემსრულებელ იური სლუსარის ტელეგრამ-არხზე გამოქვეყნდა ცნობა, რომ ტაგანროგზე იყო სარაკეტო შეტევა, რომლის შედეგად, წინასწარი მონაცემებით, არავინ დაშავებულა.
სლუსარის თანახმად დაზიანებულია საწარმო. კონკრეტულად რომელი, გუბერნატორის მოვალეობის შემსრულებელს არ უთქვამს.
აზოვის ზღვის ნაპირზე მდებარე ტაგანროგი როსტოვის ოლქის სამრეწველო ცენტრია, სადაც განთავსებულია საავტომობილო, მეტალურგიული, ავიამშენებელი და ელექტროთერმული მოწყობილობების მწარმოებელი ქარხნები.
შუაღამის შემდეგ აფეთქებები იყო რუსეთის ქალაქ ბრიანსკშიც.
ბრიანსკის ოლქის გუბერნატორ ალექსანდრ ბოგომაზის ტელეგრამ-არხზე გამოქვეყნებული ცნობით, უპილოტო საფრენი აპარატით შეტევის შედეგად ხანძარი გაჩნდა „სამრეწველო ობიექტზე“. საწარმოს არც ბოგომაზი აკონკრეტებს.
ქალაქ ბრიანსკში განთავსებულია 30-ზე მეტი საწარმო, მათ შორის საავტომობილო, ქიმიური და ნავთობგადამამუშავებელი ქარხნები.
გუბერნატორის მტკიცებით, ღამის განმავლობაში რუსეთის საჰაერო თავდაცვის ძალებმა ბრიანსკის ოლქში გაანადგურეს, საერთო ჯამში, 10 უკრაინული დრონი. ბოგომაზის თანახმად, არავინ დაშავებულა. დამოუკიდებელი წყაროებით ეს ცნობები გადაუმოწმებელია.
უკრაინას რუსეთის რეგიონებზე დღევანდელი შეტევის შესახებ ჯერჯერობით არაფერი უთქვამს.
უკრაინის თავდაცვის ძალებს რუსეთის ტერიტორიაზე სამიზნედ აქვთ გამოცხადებული სამხედრო ობიექტები და საწარმოები, რომლებიც რუსული არმიის მომარაგებაზე მუშაობენ.