Такси кушымтасында хәвеф төймәсе булдыру турында закон проекты тәкъдим итәргә җыеналар
Думаның Контроль комитеты рәисенең беренче урынбасары Дмитрий Гусев Дәүләт Думасына такси хезмәтен кушымталарның төп экранына хәвеф төймәсен интеграцияләргә мәҗбүр итә торган закон проектын кертергә ниятли. Бу хакта «РИА Новости» яза.
Закон проекты нигезендә, такси заказы хезмәтләре үз кушымтасында хәвеф төймәсе булуны тәэмин итәргә тиеш булачак, хәвеф сигналын йөртүче дә, пассажир да бирә алачак. Моннан тыш, сигнал бирелгән җайланманың микрофоныннан язманы саклау каралган. Әгәр интернет булмаса, сигнал автомобиль эчендә тавышны мәҗбүри теркәү белән телефон элемтәсе ярдәмендә тапшырылырга тиеш.
Закон проекты авторлары хәвеф төймәсе кушымтаның төп битендә булырга һәм гадәттән тыш хәл очрагында тиз арада хәбәр җибәрергә тиеш дип саный.
«Без көчләү, сугышу һәм хәтта таксида үтерү очраклары турында беләбез. Болай дәвам итә алмый. Хәвеф төймәсе кую - кешеләрне саклауның гади һәм нәтиҗәле ысулы. Яңалык кискен вазгыятьләрдә ярдәмне җиңеләйтеп кенә калмыйча, хокук бозучыларны гамәлләреннән тыеп тора торган фактор да булачак», — диде Гусев.
Парламентарий сүзләренчә, әлеге идеяне гамәлгә ашыру бүген үк мөмкин, чөнки ул зур чыгым таләп итми, әмма хәвеф төймәсен булдыру кулланучыларның әлеге функцияне беренче булып кертәчәк такси хезмәтләренә ышанычын арттырачак.