Путин Кремльдә Кадыровка II дәрәҗә «Ватан алдындагы казанышлары өчен» орденын тапшырды
Россия Президенты Владимир Путин Чечня Республикасы Башлыгы Рамзан Кадыровка II дәрәҗә «Ватан алдындагы казанышлары өчен» орденын тапшырды. Бу хакта тантанада катнашучыларның берсе төшергән видеога сылтама белән ТАСС хәбәр итә.
Кадрларда күренгәнчә, бүләкләү тантанасы Мәскәү Кремлендә узган. Чара турында рәсми хәбәр ителмәде, дип белдерә агентлык.
Кадыровның II дәрәҗә «Ватан алдындагы казанышлары өчен» орденына лаек булуы турында 2024 елның февралендә билгеле булды. Ул «Россия дәүләтчелеген, илнең оборона сәләтен ныгытуга һәм Чечня Республикасының социаль-икътисади үсешенә зур өлеш керткәне өчен» бүләкләнде.