Путин Россия икътисадының моңарчы күрелмәгән санкцияләр фонында үсүен әйтте
Россия үсеш кичерүен дәвам итә һәм ил икътисады санкцияләргә дә карамастан үсә. РФ Президенты Владимир Путин «Бердәм Россия» партиясе съездында ясаган чыгышында шулай дип белдерде.
«Россия үсеш кичерә, икътисад үсә. Һәм бу дөнья тарихында моңарчы күрелмәгән санкцияләр фонында», - диде Россия лидеры.
Ул шулай ук Россиянең уникаль һәм үзенчәлекле цивилизация булуын билгеләп үтте. Әлеге илдә яшәүче халыклар, эчке яктан күп төрлелеккә дә карамастан, бердәм булачак.
Дәүләт башлыгы Хөкүмәтнең ил образын сакларга һәм киләсе буыннарга тапшырырга тырышуын әйтте.